Adətən, siz yeni bir insanla münasibət qurmağa başlayanda arzulayırsınız ki, münasibətiniz anlaşılmazlıqlar və ittifaqınızı dağıda biləcək digər mənfi məqamlarla kölgələnməsin. Xüsusilə də dostların və yaxınların məsləhətlərinə qulaq asırsınızsa, hansı ki, guya kənardan baxanda sizin cütlüyünüz üçün nəyin daha yaxşı olduğunu daha yaxşı görürlər.
Kanall17.org Tribuna.az-a istinadən ideal münasibət qurmağa kömək etməyən, əksinə partnyorunuzla ayrılığınızı sürətləndirə biləcək zərərli məsləhətləri təqdim edir:
Yalnız lazım bildiyinizi edin
Mütəxəssislərin fikrincə, evlilik – başqa bir insanın yanında özün olaraq qalmaq deməkdir. Əgər siz özünüzü olduğunuz kimi göstərə bilirsinizsə və rol oynamırsınızsa, deməli, sizi işıqlı gələcək gözləyən öz yarınızı tapmısınız.
Amma bu o demək deyil ki, münasibətdə həddini aşmalı və eqoist davranmalısınız. Siz kompromislər axtarmalı və bəzi vacib məsələlərdə razılaşmağı öyrənməlisiniz. Əks halda anlaşılmazlıqlar və davamlı mübahisələr sizin birliyinizi məhv edə bilər.
Partnyorunuzun zəif tərəflərinə daha dözümlü olun və eyni münasibəti özünüzə də tələb edin. Qarşılıqlı hörmət və anlaşma sizə hisslərinizi qorumağa və uzun illər xoşbəxt evlilikdə yaşamağa kömək edəcək.
Maliyyə mövzusunu heç bir halda müzakirə etməmək
Əgər siz maddiyyat düşkünü kimi görünmək istəmirsinizsə və ya ailə büdcəsi haqqında danışmağa cəsarətiniz çatmırsa belə, yenə də özünüzü aşmalı və bəzi məqamları aydınlaşdırmalısınız.
Psixoloqlar xatırladır ki, pul məsələsinə görə bir çox ailələr hər gün mübahisə edir. Bəs niyə siz də onların sırasına qoşulasınız? Daha yaxşısı bir dəfə oturub razılaşmaqdır ki, kim ümumi xərclərə nə qədər pul verəcək və şəxsi xərclər üçün nə qədər saxlayacaqsınız (ya da ümumiyyətlə maliyyənizi birləşdirib bütün məsələləri birlikdə həll edəcəksiniz).
İnanın, bu mövzunu açmaqda qorxulu heç nə yoxdur. Daha qorxulusu isə qeyri-müəyyənlik içində yaşamaq və növbəti dəfə hansı məişət məsələsi yarananda kimin nə qədər ödəyəcəyini düşünməkdir.
Ər üçün dəyişməmək, qoy o sizin üçün dəyişsin
Həqiqətən də, siz sevdiyiniz insanla evlənmisiniz, arzuladığınız ailəni qurmusunuz və artıq rahatlaşmaq olar – bir çox rəfiqələr məhz belə düşünür. Onlar məsləhət görürlər ki, heç vaxt həyat yoldaşınızın sözünə getməyin və əksinə onu özünüzə uyğun dəyişin.
Amma psixoloqlar bildirir ki, bu yanaşmadan yaxşı heç nə çıxmayacaq. Əgər siz insanı tamamilə dəyişmək istəyirsinizsə, deməli onu sevmirsiniz və sizə başqa, daha uyğun biri lazım idi.
Üstəlik, zəmanət varmı ki, o sizin istədiyiniz kimi olandan sonra siz bu münasibətdən bezməyəcəksiniz? Evlilik yalnız o zaman möhkəm və xoşbəxt olur ki, hər iki tərəf dəyişmək və daha yaxşı olmaq istəsin – münasibət üçün faydalı olduğu üçün, yoxsa kiminsə istəyi ilə partnyoru “yenidən qurmaq” üçün yox.
Başqa kişilərlə flört etmək ərinizin marağını artıracaq
Bu da rəfiqələrdən eşidilə bilən başqa bir axmaq məsləhətdir. Partnyorunuzda qısqanclıq yaratmaq, onun sizə qarşı hisslərinin qalıb-qalmadığını yoxlamaq yaxşı fikir deyil.
Birincisi, siz həddi aşa və onu həqiqətən incidə bilərsiniz. Əriniz düşünə bilər ki, siz onu aldadırsınız və sizi tərk edə bilər.
İkincisi, əgər o artıq sizinlə qalmaq və ya başqa yerdə xoşbəxtlik tapmaq arasında tərəddüd edirdisə, sizin bu davranışınız onun qərarını sizin əleyhinizə dəyişə bilər. O düşünə bilər ki, siz ona da istədiyi kimi davranmaq üçün “azadlıq” vermisiniz.
Belə riskə gedərkən, xoşagəlməz nəticələrə hazır olun.
Yaş fərqi nə qədər çox olsa, bir o qədər yaxşıdır
Əslində hər şey sadədir: əgər siz birlikdə xoşbəxtsinizsə, yaş fərqinə fikir verməyəcəksiniz.
Amma əgər özünüzü narahat hiss edirsinizsə, ortaq mövzularınız yoxdursa və gələcəyə baxışlarınız fərqlidirsə, bu halda münasibət qurmaq çətin olacaq – yaş fərqindən asılı olmayaraq.
Əgər partnyorunuzu sevir və dəyərləndirirsinizsə, yaş fərqini nəzərə alın və bəzən nəsillərarası fərqlərlə üzləşəcəyinizə hazır olun.
Əri istənilən yolla yanında saxlamaq
Bəzi qadınlar hesab edir ki, sevgidə bütün vasitələr keçərlidir və həyat yoldaşını yanında saxlamaq üçün istənilən üsuldan istifadə etmək olar.
Amma əgər hisslər bitibsə və insan xoşbəxtliyi başqa yerdə axtarmaq istəyirsə, onu saxlamaq düzgün deyil. Əgər hisslər qarşılıqlı deyilsə, siz həm özünüzü, həm də onu xoşbəxt gələcəkdən məhrum edirsiniz.
Daha yaxşısı partnyorunuzu buraxmaq və özünüz də daha uyğun biri ilə xoşbəxt olmağa çalışmaqdır.
Ümumiyyətlə, münasibətində sülh və qarşılıqlı anlaşma olan cütlüklər bir-birinə zərər verməyi heç düşünmürlər. Onların hər şeyi yaxşıdırsa, niyə bir-birini zorla saxlasınlar?
Niyə ayrıca evə pul xərcləmək? Valideynlərlə yaşamaq olar
Bu, yeni evlənənlərin ən böyük problemlərindən biridir. Statistikaya görə, valideynlərlə eyni evdə yaşayan cütlüklərin çoxu qısa müddətdə ayrılmaq riski ilə üzləşir.
Çox çətindir ki, daim böyüklərin nəzarəti altında ailə həyatı qurulsun. Onlar tez-tez məişət və şəxsi məsələlərlə bağlı “məsləhətlər” verirlər və bu da münasibətə mənfi təsir edir.
Səbrin də bir həddi var. Bir gün gərginlik artır və cütlüklər boşanmağa qərar verə bilirlər (əgər vaxtında ayrı evə köçməsələr).
Ona görə də rəfiqələriniz qənaət etmək üçün ayrıca evdən imtina etməyi məsləhət görürsə, əvvəl yaxşı düşünün: münasibətinizi bu sınağa salmağa hazırsınız, yoxsa müstəqil yaşamaq daha yaxşıdır?
Siz uşaq doğmusunuz, onu böyütmək isə ərinizin işidir
Bəzi qadınlar “məsləhətlərə” qulaq asaraq uşağın tərbiyəsini demək olar ki, tamamilə həyat yoldaşının üzərinə qoyurlar. Onlar düşünürlər ki, hamiləlik və doğuşun çətinliklərini yaşadıqları üçün artıq özlərinə vaxt ayıra bilərlər.
Amma reallıq fərqlidir. Uşağın ilk ili ən çətin dövrdür və siz çoxlu sınaqlardan keçəcəksiniz.
Psixoloqlar deyir ki, məhz bu dövrdə bir çox cütlük çətinliklərə dözməyərək ayrılır. Əgər siz bütün məsuliyyəti partnyorun üzərinə qoysanız, o da ilk fürsətdə uzaqlaşa bilər.
Münasibəti qorumaq üçün vəzifələri bölüşdürün və bir-birinizi dəstəkləməyi unutmayın.
